Kum shibynta na ka jingkynmaw tympang ia u myllung Soso Tham ( bam kwai ha dwar u Blei) Ka Soso tham Commemorative Society ka la plie ia ki artylli ki dur mot ha Cherra Teachers’ Training Centre, Nongsawlia,Sohra bad ha phyllaw ophis jong u syiem ka hima Sohra ha ka 3 tarik u Risaw ha kaba la iadonlang ruh u Bah R.V.Lyngdoh ,Chairman ka M.T.D.C & M.L.A ka Mylliem,U Dr.P.W. Khongjee,M.L.A & Parliamentary Secretary ka Tourism, U Sanjay Goyal, Deputy Commissioner ka East Khasi Hills, U Cyril V.Darlong Diengdoh,Sub-Divisional Officer ( C ),Sohra ,U Freeman Sing Syiem, Syiem Sohra ,ka kur Tham bad kiwei kiwei. La pynbud ia kane ka jingplie mot da ka jingialang paidbah ba i-shongkun ha St. John Bosco Shrine Auditorium,Sohra ha kaba u bah R.V.Lyngdoh ,Chairman ka M.T.D.C u la long u kongsan bad u Dr.P.W.Khongjee u la long u symbud kongsan.
Haba kren kum u kongsan , u Bah Lyngdoh u la ong ba ka long ka burom ban ia don lang ha kane ka jingrakhe kynmaw tympang ia une u myllung uba la noh shibun u synniang u bynhei ha ka thoh ka tar Khasi bad khamtam eh ia ka jaidbynriew baroh kawei. U la ong ruh ba u myllung u dei uba ieid ia ka jingitynnad ka mariang kumba ka paw lyngba ki poitri jongu, kumta u la wer bad kyntu ia ki nongshong shnong ban pynneh pynsah ia ka jingitynnad ka mariang bad ka jingkhuid jingsuba. U la wer bad kyntu ia ki khynnah skul ban bud ia ki dienjat jong une u riewkhraw khnang ban poi sha kliar lum jong ka nam.
Haba kren kum u Symbud kongsan u Dr.Khongjee u la pyrto ia ki kam jong une u myllung ka ri bad u pynkynmaw ia ki kyntien na ki jingrwai jong une u myllung ba khraw bad u la ong ba kane ka dei ka sngi ka ban sah kynmaw ha ka histori jong ki nong Sohra. Ha kajuh ka por u la iaroh ia ka sap ka phong kaba ki khynnah ki la pyni lyngba ki skit bad drama bad u da wer ruh ia ki ban pynneh ia ka akor bad ka burom ki nong Sohra.
La ioh ruh ia ka jingsam prais sha ki nongjop ha ka Essay,Poetry bad debate Compe –tition bad ha kajuh ka por la pyllait paidbah ia “ U Soso Tham” ka kot ba la thoh da I bah K.W. Nongrum.
Kiwei pat kiba la kren ha kane ka sngi ki long U Sanjay Goyal,Deputy Commissioner,East Khasi Hills,Freemansing Syiem, Syiem Sohra, Bah V.Nianglang ,Sub Divisional School Education Officer, Sohra, bah K.W.Nongrum, Khasi Author’s Society bad I Kong Sara Tham (Soso Tham’s relative).
U bah Cyril V.Darlong Diengdoh , S.D.O (C ), Sohra u la pyniaid ia ka jingialang ha kane ka sngi.La ioh ia ka jingkren pdiang sngewbha na I kong B.Ranee , Extra Assistant Commissioner, Sohra katba I kong A.Pathaw , Librarian I la ai ia ki kyntien khublei .
